കാസര്‍കോട്: മൊഗ്രാല്‍ പുത്തൂര്‍ ദേശീയ പാതയില്‍ റോഡ് റോളറിനു പിന്നില്‍ കാറിടിച്ച് ഒരാള്‍ മരിച്ചു. സഹയാത്രികനു പരിക്കേറ്റു. മലപ്പുറം തിരൂരങ്ങാടി മമ്പറത്തെ കുഞ്ഞാലി ഹാജിയുടെ മകന്‍ മെഹബൂബ് (32) ആണ് മരിച്ചത്. ഗുരുതരമായി പരിക്കേറ്റ സഹയാത്രികനെ പരിയാരം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.
വെള്ളിയാഴ്ച രാവിലെ കല്ലങ്കൈയിലാണ് അപകടം. മംഗളൂരു ഭാഗത്തു നിന്നു എത്തിയ കാര്‍ മുന്നില്‍ ഓടിക്കൊണ്ടിരുന്ന റോഡ് റോളറിന്റെ പിന്‍ഭാഗത്ത് ഇടിച്ചാണ് അപകടം. ഇടിയുടെ ആഘാതത്തില്‍ മുന്‍വശം തകര്‍ന്ന കാര്‍ 50 മീറ്റര്‍ മുന്നോട്ടു നീങ്ങിയാണ് നിന്നത്. കാറിലുണ്ടായിരുന്ന രണ്ടു പേരെയും ഉടന്‍ തന്നെ ജനറല്‍ ആശുപത്രിയില്‍ എത്തിച്ചെങ്കിലും മെഹബൂബ് മരണപ്പെട്ടിരുന്നു. കാസര്‍കോട് ടൗണ്‍ പൊലീസ് കേസെടുത്ത് അന്വേഷണം തുടങ്ങി. കുഞ്ഞാലന്‍ ഹാജി- സൈനബ ദമ്പതികളുടെ മകനാണ് മെഹബൂബ്. ഭാര്യ: ഉമ്മു സല്‍മ. സഹോദരങ്ങള്‍: ഹാരിസ്, സാദിഖ്, സാലി, സാബിറ.
