കാസര്‍കോട്: കാസര്‍കോട്, ഭട്ക്കല്‍, മണിപ്പാല്‍ എന്നിവിടങ്ങളില്‍ നിന്ന് മംഗളൂരു രാജ്യാന്തര വിമാനത്താവളത്തിലേക്ക് കെ.എസ്.ആര്‍.ടി.സി ഇലക്ട്രിക് ബസുകള്‍ സര്‍വീസ് നടത്തും. നേരത്തെ, വോള്‍വോ ബസ് അവതരിപ്പിച്ചെങ്കിലും പിന്നീട് പിന്‍വലിച്ചിരുന്നു. ഈ റൂട്ടുകളില്‍ നാലു ഇലക്ട്രിക് ബസുകള്‍ സര്‍വീസ് നടത്തും. സര്‍വീസിനായി പ്രത്യേക അനുമതിയുടെ ആവശ്യമില്ലെന്നാണ് വിവരം. രജിസ്‌ട്രേഷന്‍ മാത്രം മതിയാകും. വിമാന കംപനികള്‍ അവരുടെ വെബ്‌സൈറ്റില്‍ ഇലക്ട്രിക് ബസ് സമയത്തെക്കുറിച്ചുള്ള വിശദാംശങ്ങളും പങ്കിടും. ഇതുമായി ബന്ധപ്പെട്ട് കെ.എസ്.ആര്‍.ടി.സി അധികൃതര്‍ വിമാന കമ്പനി അധികൃതരുമായി ചര്‍ച്ച നടത്തി.
കെഎസ്ആര്‍ടിസിയുടെ മംഗളൂറു ഡിവിഷനിലേക്ക് 45 ഇലക്ട്രിക് ബസുകള്‍ ലഭിക്കുന്നുണ്ട്, അതില്‍ നാലു ബസുകളാണ് വിമാനത്താവളത്തിലേക്ക് ഓടിക്കുക. ധര്‍മസ്ഥല, ഉഡുപി, കാസര്‍കോട്, കുന്ദാപുര, ഭട്കല്‍ തുടങ്ങിയ റൂടുകളിലൂടെ മറ്റുള്ളവ സര്‍വീസ് നടത്തുമെന്നാണ് അറിയുന്നത്. മംഗ്‌ളുറു, ഉഡുപി, കുന്ദാപുര, ധര്‍മസ്ഥല എന്നിവിടങ്ങളില്‍ ഇവി ചാര്‍ജിംഗ് പോയിന്റുകള്‍ ഒരുക്കും. ഒരിക്കല്‍ ചാര്‍ജ് ചെയ്താല്‍ 200 കിലോമീറ്റര്‍ ഓടാന്‍ ബസുകള്‍ക്ക് കഴിയും, ഫുള്‍ ചാര്‍ജിംഗിന് ഏകദേശം നാലു മണിക്കൂറെടുക്കും.
Post a Comment
0 Comments