മുംബൈ: സ്വയം പ്രഖ്യാപിത ആള്‍ദൈവം ധീരേന്ദ്ര കൃഷ്ണ ശാസ്ത്രിയുടെ പരിപാടിയില്‍ പങ്കെടുക്കാനെത്തിയ 36 പേരുടെ സ്വര്‍ണാഭരണങ്ങള്‍ മോഷണം പോയതായി പരാതി. മീരാ റോഡിലെ സലാസര്‍ സെന്‍ട്രല്‍ പാര്‍ക്ക് ഗ്രൗണ്ടില്‍ ശനിയാഴ്ച ആരംഭിച്ച ദ്വിദിന പരിപാടിയില്‍ പങ്കെടുക്കാനെത്തിയ അനുയായികളുടെ ആഭരണങ്ങളാണ് കവര്‍ന്നത്. വിലപിടിപ്പിള്ള സ്വര്‍ണാഭരണങ്ങളാണ് മോഷണം പോയതെന്നും ഇക്കാര്യം പരിശോധിച്ചുവരികയാണെന്നും മീരാ റോഡ് പൊലീസ് ഉദ്യോഗസ്ഥര്‍ പറഞ്ഞു.
രണ്ട് ലക്ഷത്തിലധികം പേരാണ് പരിപാടിയില്‍ പങ്കെടുത്തത്. ആളുകളുടെ തിക്കും തിരക്കിലും ഒരു സ്ത്രീക്ക് പരിക്കേറ്റു. ഇത്രയും വലിയ ജനക്കൂട്ടത്തെ കൈകാര്യം ചെയ്യുന്നതില്‍ സംഘാടകര്‍ക്ക് പിഴവ് വന്നതായും റിപ്പോര്‍ട്ടുകളുണ്ട്. തിക്കും തിരക്കുമുണ്ടായപ്പോള്‍ ആളുകള്‍ക്ക് പരിക്കേല്‍ക്കാതിരിക്കാനാണ് പൊലീസ് ശ്രദ്ധിച്ചത്. എന്നാല്‍ അത് മുതലെടുത്താണ് മോഷണം നടന്നതെന്നാണ് കരുതുന്നത്.
ആള്‍ദൈവത്തിന്റെ രോഗശാന്തി ശക്തി വീഡിയോകള്‍ മൊബൈല്‍ ഫോണില്‍ കണ്ടതുകൊണ്ടാണ് മകളുമായി അവിടെ എത്തിയതെന്ന് പരാതിക്കാരിയായ യുവതി പറയുന്നു. മകളുടെ രോഗം മാറ്റുമെന്ന് പ്രതീക്ഷിച്ചെത്തിയ എന്റെ വിലപിടിപ്പുള്ള താലിമാലയാണ് കള്ളന്മാര്‍ കൊണ്ടുപോയതെന്നും ഇവര്‍ പറയുന്നു. അതേസമയം, സ്ഥലത്ത് നില്‍ക്കാനോ ഇരിക്കാനോ പോലും സ്ഥലമില്ലായിരുന്നെന്നും പരാതിക്കാര്‍ ഉന്നയിക്കുന്നു.
Post a Comment
0 Comments