'കരുവന്നൂര്‍ സഹകരണബാങ്ക് ക്രമക്കേട്; 38.75 കോടി തിരിച്ചുനല്‍കി'

കോട്ടയം: കരുവന്നൂർ സഹകരണ ബാങ്കിൽ 104 കോടിയുടെ ക്രമക്കേട് നടന്നതായി അന്വേഷണത്തിൽ വ്യക്തമായതായി മന്ത്രി വി എൻ വാസവൻ പറഞ്ഞു. കരുവന്നൂർ ബാങ്ക് ഇതിനകം 38.75 കോടി രൂപ നിക്ഷേപകർക്ക് തിരികെ നൽകിയിട്ടുണ്ടെന്നും അദ്ദേഹം അവകാശപ്പെട്ടു. ബാങ്കിൽ നിക്ഷേപിച്ച പണം തിരികെ ലഭിക്കാത്തതിനാൽ വിദഗ്ധ ചികിത്സ തേടാൻ കഴിയാതെ മരിച്ച ഫിലോമിനയുടെ കുടുംബത്തിന് 4.60 ലക്ഷം രൂപ തിരികെ നൽകി. ജൂൺ 28ന് ബാങ്കിനെ സമീപിച്ചപ്പോൾ പണം നൽകാൻ കഴിഞ്ഞില്ല. ജീവനക്കാർ മോശമായി പെരുമാറിയെന്ന പരാതി അന്വേഷിക്കാൻ സഹകരണ സംഘങ്ങളുടെ അഡീഷണൽ രജിസ്ട്രാറെ ചുമതലപ്പെടുത്തി. റിപ്പോർട്ട് ലഭിച്ചാലുടൻ കർശന നടപടി സ്വീകരിക്കുമെന്നും അദ്ദേഹം പറഞ്ഞു. കരുവന്നൂർ ബാങ്കിലെ ക്രമക്കേടുകൾക്കെതിരെ ശക്തമായ നടപടി സ്വീകരിച്ചതായും മന്ത്രി പറഞ്ഞു. ഇപ്പോൾ ബാങ്കിന്‍റെ പ്രവർത്തനം സാധാരണ നിലയിലായി. നിക്ഷേപകരുടെ പണം തിരികെ നൽകാൻ കേരള ബാങ്കിൽ നിന്ന് 25 കോടി രൂപയുടെ ഓവർ ഡ്രാഫ്റ്റ് ഉടൻ വാങ്ങും. സഹകരണ മേഖലയെ തകർക്കാനുള്ള ആസൂത്രിത നീക്കമാണ് നടക്കുന്നതെന്നും മന്ത്രി പറഞ്ഞു. ഓഡിറ്റ് ഡയറക്ടറേറ്റ് പുനഃസംഘടിപ്പിച്ചതായും സഹകരണ മേഖലയുടെ മെച്ചപ്പെട്ട പ്രവർത്തനത്തിനായി സമഗ്രമായ ഭേദഗതി കൊണ്ടുവരുമെന്നും മന്ത്രി കൂട്ടിച്ചേർത്തു. സംസ്ഥാനത്തെ 164 സഹകരണ സംഘങ്ങൾ സാമ്പത്തിക ബാധ്യതയിലാണെന്ന വാർത്ത തെറ്റിദ്ധാരണാജനകമാണ്. 132 സഹകരണ സംഘങ്ങളിൽ മാത്രമാണ് പ്രശ്നം. ഇവയിൽ പലതും സർവീസ് സഹകരണ ബാങ്കുകളല്ലെന്നും സംസ്ഥാനത്തെ സർവീസ് സഹകരണ ബാങ്കുകളുടെ എണ്ണം വളരെ കുറവാണെന്നും മന്ത്രി പറഞ്ഞു. കോട്ടയത്ത് വാർത്താസമ്മേളനത്തിൽ സംസാരിക്കുകയായിരുന്നു അദ്ദേഹം.