കുടുംബവഴക്കിനിടെ ഭാര്യാവീടിന് പെട്രോളൊഴിച്ച് തീകൊളുത്തി: ഭര്‍ത്താവ് അറസ്റ്റില്‍

ചെറുവത്തൂര്‍ (www.evisionnews.co): കുടുംബവഴക്കിനിടെ ഭാര്യയുടെ ഇരുനില വീടിന് പെട്രോളൊഴിച്ച് തീകൊളുത്തിയ സംഭവത്തില്‍ ഭര്‍ത്താവ് അറസ്റ്റില്‍. കൈതക്കാട് കുഴിത്തൊടിയിലെ എം.വി നസീമയുടെ വീടിനാണ് തീകൊളുത്തിയത്. സംഭവത്തില്‍ നസീമയുടെ ഭര്‍ത്താവ് പാണത്തൂര്‍ കോളിച്ചാലിലെ കെ.എം അബ്ദുല്‍ നാസറിനെയാണ് ചന്തേര പോലീസ് അറസ്റ്റ് ചെയ്തത്. 

തിങ്കളാഴ്ച ഉച്ചയോടെയാണ് സംഭവം. സംഭവസമയത്ത് നസീമയും മകനും വീട്ടിനകത്തുണ്ടായിരുന്നു. വീട്ടിനകത്തേക്ക് തീവരുന്നത് കണ്ട് ഭയചകിതരായ നസീമയും മകനും പുറത്തേക്കോടിയതിനാല്‍ പൊള്ളലേല്‍ക്കാതെ രക്ഷപ്പെട്ടു. മൂന്ന് കിടപ്പുമുറികള്‍, ഡൈനിംഗ് ഹാള്‍, സ്റ്റോര്‍ റൂം എന്നിവയിലെ ഭൂരിഭാഗം സാധനങ്ങളും കത്തിനശിച്ചു.