കാസര്കോട് (www.evisionnews.co): ചെമ്പരിക്ക ഖാസി സി.എം അബ്ദുല്ല മുസ്ലിയാരുടെ ദൂരൂഹ മരണം സംബന്ധിച്ച് സി.ബി.ഐ പുനരന്വേഷണം നടത്തുമെന്ന് കേന്ദ്ര ആഭ്യന്തര വകുപ്പ് മന്ത്രി അമിത് ഷാ, കാസര്കോട് എം.പി രാജ്മോഹന് ഉണ്ണിത്താന് ഉറപ്പുനല്കി. കേരളത്തിലെ 19എം.പിമാരുടെ ഒപ്പ് സമാഹരിച്ച് കേന്ദ്ര ആഭ്യന്തര വകുപ്പ് മന്ത്രിക്ക് സമര്പ്പിച്ച നിവേദനത്തിന്റെ അടിസ്ഥാനത്തിലാണ് മന്ത്രി ഉറപ്പ് നല്കിയത്. ആഭ്യന്തര വകുപ്പ് മന്ത്രിയെ കോണ്ഗ്രസ് പാര്ലിമെന്ററി പാര്ട്ടി ചീഫ് വിപ്പ് കൊടിക്കുന്നില് സുരേഷിനോടൊപ്പമാണ് രാജ് മോഹന് ഉണ്ണിത്താന് സന്ദര്ശിച്ചത്.
2010 ഫെബ്രുവരി 15ന് രാവിലെ 6.50നാണ് സി.എം അബ്ദുല്ല മുസ്ലിയാരുടെ മൃതദേഹം വീട്ടില് നിന്നുമാറി 900 മീറ്റര് അകലെയുള്ള ചെമ്പരിക്ക കടപ്പുറത്തുനിന്ന് 40 മീറ്റര് അകലെ പൊങ്ങിക്കിടക്കുന്ന നിലയില് കണ്ടത്. ചെമ്പരിക്ക ഖാസിയുടേത് ആത്മഹത്യ തന്നെയെന്ന നിലപാടില് പൊലീസ് ഉറച്ചുനില്ക്കുകയാണ്. സാത്വികനായ പണ്ഡിതന്, ഒരു ഡസനിലേറെ പ്രാമാണിക ഗ്രന്ഥങ്ങളുടെ കര്ത്താവ്, സമസ്ത ഫത്വാ കമ്മിറ്റിയംഗം, ഒട്ടേറെ മത സാമൂഹിക സ്ഥാപനങ്ങളുടെ അമരക്കാരന് എന്നീ നിലകളില് ശ്രദ്ധേയനായ അദ്ദേഹം ആത്മഹത്യ ചെയ്തു എന്ന പൊലീസ് ഭാഷ്യം പരിഹാസ്യമാണ്. കുടുംബാംഗങ്ങളും സമസ്ത കേരള ജംഇയത്തുല് ഉലമയും ഈ പൊലീസ് ഭാഷ്യം തള്ളി നിഷ്പക്ഷമായ ഒരു അന്വേഷണത്തിനായി സമര പാതയിലാണ്.
ആദ്യം അന്വേഷിച്ച ബേക്കല് പൊലീസും പിന്നീട് അന്വേഷിച്ച ക്രൈംബ്രാഞ്ചും അന്വേഷണ റിപ്പോര്ട്ട് സമര്പ്പിക്കുന്നതിന് മുമ്പ് സി.ബി.ഐ അന്വേഷണം ഏറ്റെടുത്തിരുന്നു. ഖാസി ചെമ്പിരിക്ക കടപ്പുറത്തെ പാറയുടെ മുകളില് നിന്ന് ചാടി ആത്മഹത്യ ചെയ്തതാണെന്ന നിഗമനത്തിലാണ് സി.ബി.ഐ എത്തിച്ചേര്ന്നത്. ഇതിനെ എറണാകുളം സി.ജെ.എം കോടതി നിശിതമായി വിമര്ശിച്ചിരുന്നു.
Post a Comment
0 Comments