ജനം നോക്കി നിൽക്കെ റോഡരികിൽ യുവതിയെ മദ്യപൻ മാനഭംഗപ്പെടുത്തി

വിശാഖപട്ടണം:(www.evisionnews.co)ജനം നോക്കി നിൽക്കെ റോഡരികിൽ യുവതിയെ മദ്യപൻ മാനഭംഗപ്പെടുത്തി. വിശാഖപട്ടണത്ത് റെയിൽവേ സ്റ്റേഷനു മുന്നിലാണ് യുവതിക്ക് നേരെ ആക്രമണമുണ്ടായത്.ബൗദ്ധികമായ വെല്ലുവിളി നേരിടുന്ന യുവതിക്കാണ് അപമാനം സഹിക്കേണ്ടി വന്നത്.  പട്ടാപ്പകൽ ആക്രമണമുണ്ടായിട്ടും ഒരാളു പോലും യുവതിയുടെ  സഹായിക്കാനെത്തിയില്ല.

സമീപത്തു കൂടി പോകുകയായിരുന്ന ഓട്ടോഡ്രൈവറാണ് സംഭവത്തിന്റെ വിഡിയോ പകർത്തി പൊലീസിനെ അറിയിച്ചത്. തുടർന്ന് പോലീസ് പ്രതിയായ ഗൻജി ശിവ എന്നയാളെ അറസ്റ് ചെയ്തു. വിവരം ലഭിച്ച് മിനിറ്റുകൾക്കകം സംഭവസ്ഥലത്തെത്തിയതായി പൊലീസ് അറിയിച്ചു.

പ്രതിക്കെതിരെ  ഒട്ടേറെ ക്രിമിനൽ കേസുകൾ നിലവിലുണ്ട്. മദ്യപൻ യുവതിയെ ആക്രമിക്കുന്ന വിഡിയോ സമൂഹമാധ്യമങ്ങളിലൂടെ പ്രചരിക്കപ്പെട്ടു. ന്യൂ റെയില്‍വേ കോളനിയില്‍ ഞായറാഴ്ച ഉച്ചയ്ക്കു രണ്ടരയോടെയായിരുന്നു സംഭവം.റോഡരികിൽ ഒരു മരത്തിന്റെ മറവിലായിരുന്നു യുവാവായ പ്രതിയുടെ അക്രമം. രണ്ടു ദിവസം മുൻപ് യുവതി വീട്ടുകാരോട് വഴക്കിട്ട് വീടു വിട്ട് പുറത്തിറങ്ങിയതാണെന്നു പൊലീസ് പറഞ്ഞു. രണ്ടു ദിവസമായി ഇവർ ഭക്ഷണമൊന്നും കഴിച്ചിരുന്നില്ല.  റോഡരികിൽ തളർന്നു കിടക്കുമ്പോഴാണ് യുവാവ് മാനഭംഗപ്പെടുത്തിയതെന്നും ദേശീയ മാധ്യമങ്ങൾ റിപ്പോർട്ടു ചെയ്യുന്നു.

യുവാവിനെ പ്രതിരോധിക്കാൻ പോലും യുവതിക്കു സാധിച്ചില്ല. അതേസമയം കൺട്രോൾ റൂമിലേക്ക് ഈ സംഭവം അറിയിച്ചു കൊണ്ട് കുറഞ്ഞത് ആറു ഫോൺവിളികളെങ്കിലും എത്തിയിരുന്നതായി പൊലീസ് പറയുന്നു. യുവതിയെ വൈദ്യപരിശോധനയ്ക്കായി ആശുപത്രിയിൽ പ്രവേശിപ്പിച്ചു. പ്രതിക്കെതിരെ മാനഭംഗക്കുറ്റം ഉൾപ്പെടെ ചുമത്തി കേസെടുത്തിട്ടുണ്ട്.