തിരുവനന്തപുരം (www.evisionnews.in): നടിയെ ആക്രമിച്ച കേസില്‍ തൃക്കാക്കര എം.എല്‍.എ പി.ടി തോമസ്, ആലുവ എം.എല്‍.എ അന്‍വര്‍ സാദത്ത് എന്നിവരില്‍ നിന്നും അന്വേഷണസംഘം മൊഴിയെടുക്കും. രാഷ്ട്രപതി തെരഞ്ഞെടുപ്പുമായി ബന്ധപ്പെട്ട് ഇരുഎംഎല്‍എമാരും തിരുവനന്തപുരത്തായതിനാല്‍ ഇവിടെയെത്തി ഇരുവരുടേയും മൊഴിയെടുക്കാനാണ് അന്വേഷണ സംഘത്തിന്റെ തീരുമാനം.
തൃക്കാക്കര എംഎല്‍എയായ പിടി തോമസാണ് നടി ആക്രമിക്കപ്പെട്ട സംഭവത്തില്‍ ആദ്യത്തെ അറസ്റ്റിന് വഴിവച്ചത്. സംഭവം നടന്ന രാത്രിയില്‍ നടിയെ സംവിധായകന്‍ ലാലിന്റെ വീട്ടില്‍ അക്രമിസംഘം ഉപേക്ഷിച്ചപ്പോള്‍ അവിടെ ആദ്യമെത്തിയവരില്‍ ഒരാള്‍ പിടി തോമസായിരുന്നു.
നടിയുടെ ഡ്രൈവറായ മാര്‍ട്ടിനെ അറസ്റ്റ് ചെയ്യാന്‍ പോലീസിനെ സഹായിച്ചതും ഐജി പി.വിജയന് സംഭവം സംബന്ധിച്ച് വിവരമറിയിച്ചതും അദ്ദേഹമാണ്. കഴിഞ്ഞ ദിവസം മാതൃഭൂമി ന്യൂസിന് നല്‍കിയ അഭിമുഖത്തിനിടെ സംഭവസ്ഥലത്ത് ആദ്യമെത്തിയ ആളായിട്ടും തന്റെ മൊഴി പോലീസ് രേഖപ്പെടുത്താത്തില്‍ അദ്ദേഹം വിമര്‍ശനം ഉന്നയിച്ചിരുന്നു.
കേസില്‍ പോലീസ് അറസ്റ്റ് ചെയ്യപ്പെട്ട നടന്‍ ദിലീപിന്റെ അടുത്ത സുഹൃത്തെന്ന നിലയിലാണ് ആലുവ എംഎല്‍എ അന്‍വര്‍ സാദത്തിന്റെ മൊഴി പോലീസ് രേഖപ്പെടുത്തുന്നത്. നടി ആക്രമിക്കപ്പെടുന്നതിന് മുന്‍പുള്ള ദിവസങ്ങളില്‍ താന്‍ ദിലീപിനെ നിരന്തരം ബന്ധപ്പെടാന്‍ ശ്രമിച്ചിരുന്നുവെങ്കിലും ഫോണ്‍ സ്വിച്ച് ഓഫായിരുന്നുവെന്നും പിന്നീട് സംഭവം നടന്ന് പിറ്റേ ദിവസമാണ് അദ്ദേഹത്തെ ലൈനില്‍ കിട്ടിയതെന്നുമാണ് മാധ്യമങ്ങളോട് അന്‍വര്‍ സാദത്ത് പറഞ്ഞത്.
Post a Comment
0 Comments