തിരുവനന്തപുരം (www.evisionnews.in): കൊച്ചിയില്‍ നടി ആക്രമിക്കപ്പെട്ട സംഭവത്തിലെ ദൃശ്യങ്ങള്‍ പകര്‍ത്തിയതെന്ന് കരുതിയ മെമ്മറി കാര്‍ഡ് പോലീസിന് ലഭിച്ചു. അഡ്വ. പ്രതീഷ് ചാക്കോയുടെ ജൂനിയറില്‍ നിന്നാണ് പോലീസ് മെമ്മറി കാര്‍ഡ് പിടിച്ചെടുത്തത്.
നിലവില്‍ കാര്‍ഡില്‍ ദൃശ്യങ്ങളില്ല. ദൃശ്യങ്ങള്‍ മായ്ച്ചുകളഞ്ഞതാണോ എന്നാണ് സംശയം. കാര്‍ഡ് ഫോറന്‍സിക് പരിശോധനക്ക് അയക്കുമെന്ന് പോലീസ് പറഞ്ഞു. നടിയെ ആക്രമിച്ച കേസിലെ പ്രതി പള്‍സര്‍ സുനിയുടെ മുന്‍ അഭിഭാഷകന്‍ പ്രതീഷ് ചാക്കോയുടെ ജൂനിയര്‍ ഇന്നലെയായിരുന്നു പോലീസ് കസ്റ്റഡിയില്‍ ആയത്. കൊച്ചിയില്‍ ജൂനിയര്‍ അഭിഭാഷകനായി പ്രാക്ടീസ് ചെയ്യുന്ന രാജു ജോസഫിനെയാണ് പോലീസ് കഴിഞ്ഞ ദിവസം കസ്റ്റഡിയിലെടുത്തത്.
ഒളിവില്‍ പോയിരിക്കുന്ന പ്രതീഷ് ചാക്കോയെക്കുറിച്ച് അറിയാനാണ് രാജു ജോസഫിനെ കസ്റ്റഡിയില്‍ എടുത്തിരിക്കുന്നത്. നടിയെ ആക്രമിക്കുന്നതിനിടെ പകര്‍ത്തിയ ദൃശ്യങ്ങള്‍ പ്രതീഷ് ചാക്കോക്ക് നല്‍കിയെന്ന് പള്‍സര്‍ സുനി മൊഴി നല്‍കിയിരുന്നു. ഒളിവില്‍ക്കഴിയവേ ഫെബ്രുവരി 23ന് എറണാകുളത്ത് അഭിഭാഷകന്റെ ഓഫീസില്‍ ഫോണ്‍ നല്‍കിയെന്നാണ് സുനി പറയുന്നത്. അഭിഭാഷകന്റെ വീട്ടില്‍ പരിശോധന നടത്തിയെങ്കിലും ബാഗ് മാത്രമാണ് ലഭിച്ചത്.
ഫോണ്‍ പ്രതീഷ് ദിലീപിന് നല്‍കി എന്നാണ് പോലീസ് കരുതുന്നത്. ഇത് വ്യക്തമാവണമെങ്കില്‍ പ്രതീഷ് ചാക്കോയെ ചോദ്യം ചെയ്യണം എന്നാല്‍ കഴിഞ്ഞ കൂറെ ദിവസങ്ങളായി പ്രതീഷ് ഒളിവിലാണ്.
ഇതിനെ തുടര്‍ന്ന് ചോദ്യം ചെയ്യലിന് ഹാജരാകാന്‍ പോലീസ് പ്രതീഷ് ചാക്കോയോട് കോടതി വഴി ആവശ്യപ്പെട്ടു. അന്വേഷണ ഉദ്യോഗസ്ഥര്‍ക്ക് മുന്നില്‍ ഹാജരാകണമെന്ന് ഇയാളോട് ഹൈക്കോടതി ഉത്തരവിട്ടിരുന്നു. നടി ആക്രമിക്കപ്പെട്ട കേസിലെ നിര്‍ണായക തെളിവാണ് ദൃശ്യങ്ങളടങ്ങിയ ഫോണും മെമ്മറി കാര്‍ഡും.
Post a Comment
0 Comments