തിരുവനന്തപുരം : (www.evisionnews.in) നീറ്റ് പരീക്ഷാ നടത്തിപ്പുമായി ബന്ധപ്പെട്ട് വിദ്യാര്ഥികളുടെ വസ്ത്രമഴിച്ചു പരിശോധിച്ച സംഭവം മനുഷ്യാവകാശ ലംഘനമെന്ന് മുഖ്യമന്ത്രി പിണറായി വിജയന്. പരീക്ഷാ നടത്തിപ്പില് ചില പരാതികള് ഉയര്ന്നിട്ടുണ്ട്. വിദ്യാര്ഥി-വിദ്യാര്ഥിനികളുടെ വേഷവിധാനങ്ങളില് നിര്ബന്ധിതമാറ്റങ്ങള് വരുത്തുവാന് നിര്ദേശിച്ചതുമുതല് പെണ്കുട്ടികളുടെ ആഭരണങ്ങളും മറ്റും ഒഴിവാക്കുവാന് നിര്ബന്ധിച്ചതും ഒക്കെ അതില്പ്പെടുമെന്നും മുഖ്യമന്ത്രി സമൂഹമാധ്യമത്തില് കുറിച്ചു.
മുഴുക്കയ്യന് ഷര്ട് ധരിച്ച കുട്ടികളില് പലര്ക്കും ഷര്ടിന്റെ കൈ മുറിച്ച് പ്രശ്നം പരിഹരിക്കേണ്ടി വന്നു. പെണ്കുട്ടികള്ക്ക് അവരുടെ ചുരിദാറിന്റെ കൈ മുറിക്കേണ്ടിയും ആഭരണങ്ങളും മറ്റും ഊരി മാറ്റേണ്ടിയും വന്നു. അതിനും പുറമേ അടിവസ്ത്രങ്ങളിലെ ലോഹഭാഗങ്ങള് ഒഴിവാക്കണമെന്ന് നിര്ദേശിക്കുന്നയിടം വരെ കാര്യങ്ങളെത്തിയെന്നാണ് മനസ്സിലാക്കുന്നത്. സംഭവം ശരിയാണെങ്കില് കടുത്ത മനുഷ്യാവകാശലംഘനമാണ്. പരീക്ഷയെഴുതുവാന് തയാറായി വരുന്ന കുട്ടികളുടെ മാനസികനിലയെ പോലും തകര്ക്കുന്നവിധത്തിലാണ് ഇത്തരം നിയന്ത്രണങ്ങള് അടിച്ചേല്പ്പിക്കപ്പെടുന്നത്. ഒരു പരിഷ്കൃതസമൂഹത്തിന് ഒരു തരത്തിലും അംഗീകരിക്കുവാനാകാത്ത ജുഗുപ്സാവഹമായ ഇത്തരം തീരുമാനങ്ങള് നടപ്പാക്കുവാന് പാടില്ലമുഖ്യമന്ത്രി വ്യക്തമാക്കി.
വിദ്യാര്ഥികളുടെ വസ്ത്രമഴിച്ചു പരിശോധിച്ച സംഭവത്തില് സംസ്ഥാന മനുഷ്യാവകാശ കമ്മിഷന് കേസെടുത്തിട്ടുണ്ട്. പരീക്ഷാ നിബന്ധനകളുടെ പേരില് പെണ്കുട്ടികളുടെ അടിവസ്ത്രം ഉള്പ്പെടെ അഴിപ്പിച്ച് അവഹേളിച്ചുവെന്ന പരാതിയുടെ അടിസ്ഥാനത്തിലാണ് കേസെടുത്തിരിക്കുന്നത്. സംഭവിച്ചത് ഗുരുതരമായ മനുഷ്യാവകാശ ലംഘനമാണെന്ന് ചൂണ്ടിക്കാട്ടിയാണ് നടപടി. സംഭവത്തില് ഉന്നതതല അന്വേഷണം വേണമെന്നും കമ്മിഷന് വ്യക്തമാക്കി.
Post a Comment
0 Comments