മുന്‍ ഹോസ്ദുര്‍ഗ് എം.എല്‍.എ പള്ളിപ്രം ബാലന്‍ അന്തരിച്ചു

കണ്ണൂര്‍ (www.evisionnews.in): സി.പി.ഐ സംസ്ഥാന കൗണ്‍സില്‍ അംഗമായിരുന്ന മുന്‍ ഹൊസ്ദുര്‍ഗ് എം.എല്‍.എ പള്ളിപ്രം ബാലന്‍ അന്തരിച്ചു. 78 വയസായിരുന്നു. കണ്ണൂരിലെ ആശുപത്രിയില്‍ വെച്ചായിരുന്നു അന്ത്യം. കണ്ണൂര്‍ എ.കെ.ജി ആശുപത്രിയില്‍ സൂക്ഷിച്ചിരിക്കുന്ന മൃതദേഹം ഞായറാഴ്ച രാവിലെ ഒമ്പത് മണിക്ക് വീട്ടിലെത്തിച്ചതിന് ശേഷം ഉച്ചക്ക് രണ്ടുമണി മുതല്‍ കണ്ണൂര്‍ സി.പി.ഐ ജില്ലാ കൗണ്‍സില്‍ ഓഫീസില്‍ പൊതുദര്‍ശനത്തിന് വെക്കും. വൈകിട്ട് നാല് മണിക്ക് പയ്യാമ്പലത്ത് സംസ്‌കരിക്കും.

1939 ഒക്ടോബര്‍ പത്തിന് കണ്ണൂര്‍ ജില്ലയിലെ പള്ളിപ്രത്താണ് ജനനം. സ്‌കൂള്‍ കാലം തൊട്ട് തന്നെ രാഷ്ട്രീയത്തില്‍ ആകൃഷ്ടനായ അദ്ദേഹം 1953ല്‍ ബാലസംഘം യൂണിറ്റ് സെക്രട്ടറിയായിരുന്നു. കണ്ണൂര്‍ താലൂക്ക് സെക്രട്ടറി (1970- 72), എ.വൈ.എഫ് ജില്ലാ ജോയിന്റ് സെക്രട്ടറി (1973- 74), വലിയന്നൂര്‍ ബ്രാഞ്ച് സെക്രട്ടറി (1970- 75), കണ്ണൂര്‍ താലൂക്ക് കമ്മിറ്റി അംഗം (1973 - 75), സി.പി.ഐ ജില്ലാ അസി. സെക്രട്ടറി, സംസ്ഥാന കൗണ്‍സില്‍ അംഗം (1976) എന്നീ പാര്‍ട്ടി പദവികള്‍ വഹിച്ചിട്ടുണ്ട്. 

എസ്.സി/ എസ്.ടി വികസന കോര്‍പറേഷന്‍ ചെയര്‍മാന്‍ (1987- 91), കണ്ണൂര്‍ ജില്ലാ പഞ്ചായത്ത് സ്റ്റാന്റിംഗ് കമ്മിറ്റി ചെയര്‍മാന്‍ (1996- 2005), ഭാരതീയ കേദ് മസ്ദൂര്‍ യൂണിയന്‍ സംസ്ഥാന പ്രസിഡണ്ട്, ഓള്‍ ഇന്ത്യ പീസ് ആന്‍ഡ് സോളിഡാരിറ്റി ഓര്‍ഗനൈസേഷന്‍ സംസ്ഥാന ട്രഷറര്‍, കേരള ആദിവാസി യൂണിയന്‍ സംസ്ഥാന സെക്രട്ടറി എന്നീ സ്ഥാനങ്ങളും അലങ്കരിച്ചിട്ടുണ്ട്. 2006ലാണ് ഹെസ്ദുര്‍ഗ് നിയമസഭാ മണ്ഡലത്തില്‍ നിന്നും സി.പി.ഐ സ്ഥാനാര്‍ത്ഥിയായി മത്സരിച്ച് വിജയിച്ച് നിയമസഭയിലെത്തിയത്. കറത്തുട്ടി- പാച്ചു ദമ്പതികളുടെ മകനാണ്. എ. പുഷ്പയാണ് ഭാര്യ. രണ്ട് മക്കളുണ്ട്.