ബന്തടുക്കയില്‍ ജ്വല്ലറിയുടെ ചുമര്‍ തുരന്ന് സ്വര്‍ണ്ണം കവര്‍ന്നു

ബന്തടുക്ക: (www.evisionnews.in) ബന്തടുക്ക ടൗണില്‍ പ്രവര്‍ത്തിക്കുന്ന സുമംഗലി ജ്വല്ലറിയില്‍ വന്‍ കവര്‍ച്ച. ജ്വല്ലറി കെട്ടിടത്തിന്റെ പിന്‍ ഭാഗത്തെ ചുമര്‍ തുരന്ന് അകത്തു കടന്ന കവര്‍ച്ചക്കാര്‍ ലോക്കര്‍ തകര്‍ത്താണ് കവര്‍ച്ച നടത്തിയത്. ലോക്കറിനകത്ത് ഒന്നേകാല്‍ കിലോയില്‍ അധികം സ്വര്‍ണ്ണം, 35000 രൂപ, നാലര കിലോയോളം വെള്ളി എന്നിവയാണ് സൂക്ഷിച്ചിരുന്നത്.സ്വര്‍ണ്ണം വച്ചിരുന്ന ട്രേകള്‍ ജ്വല്ലറിക്കു പുറത്തു ഉപേക്ഷിച്ച നിലയിലാണ്. പണവും വെള്ളി ആഭരണങ്ങളും നഷ്ടപ്പെട്ടിട്ടുണ്ടോയെന്നു വ്യക്തമല്ല. വിരലടയാള വിദഗ്ദ്ധരും പൊലീസ് ഡോഗ് സ്‌ക്വാഡും പരിശോധന പൂര്‍ത്തിയാക്കിയശേഷം മാത്രമേ എന്തൊക്കെ നഷ്ടപ്പെട്ടുവെന്നു വ്യക്തമാവുകയുള്ളൂ. വിവരമറിഞ്ഞ് ഡിവൈ.എസ്.പി എം.വി.സുകുമാരന്‍, ആദൂര്‍ സി.ഐ സിബിതോമസ് എന്നിവരുടെ നേതൃത്വത്തിലുള്ള സംഘം സ്ഥലത്തെത്തി അന്വേഷണം ആരംഭിച്ചു. ഇന്നു രാവിലെയാണ് സംഭവം പുറത്തറിഞ്ഞത്. ജില്ലാ ഗോള്‍ഡ് ആന്റ് സില്‍വര്‍ മര്‍ച്ചന്റ്സ് അസോസിയേഷന്‍ നേതാവ് സുമംഗലി അശോകന്റെ ഉടമസ്ഥതയിലുള്ള ജ്വല്ലറിയിലാണ് കവര്‍ച്ച നടന്നത്.