പൊവ്വല്‍ (www.evisionnews.in): കാസര്‍കോട് എല്‍.ബി.എസ് കോളജില്‍ നടക്കുന്ന കണ്ണൂര്‍ യൂണിവേഴ്സിറ്റി കലോത്സവത്തിന്റെ മുഖ്യസംഘാടകനിലൊരാളായ എസ്.എഫ്.ഐ നേതാവ് അഫ്സല് നുള്ളിപ്പിടിയുടെ മരണത്തെതുടര്‍ന്ന് ശനിയാഴ്ചത്തെ കലോത്സവ പരിപാടികള്‍ മാറ്റിവെച്ചതായി കണ്ണൂര്‍ യൂണിവേഴ്സിറ്റി വൈസ് ചാന്‍സലര്‍ ഡോ. ഖാദര്‍ മാങ്ങാട് അറിയിച്ചു. ശനിയാഴ്ച നടക്കേണ്ട പരിപാടികള്‍ തിങ്കളാഴ്ചയായിരിക്കും നടക്കുക. ഞായറാഴ്ചത്തെ പരിപാടികളില്‍ മാറ്റമുണ്ടാകില്ല.
ശനിയാഴ്ച പുലര്‍ച്ചെ നാല് മണിയോടെ നായന്മാര്‍മൂല പാണലത്ത് വെച്ചുണ്ടായ വാഹനാപകടത്തിലാണ് കലോത്സവത്തിന്റെ അക്കമെഡേഷന്‍ കമ്മിറ്റി കണ്‍വീനറായിരുന്ന അഫ്സല് മരണപ്പെട്ടത്. കലോത്സവത്തിന്റെ മറ്റു സംഘാടകരായ പുല്ലൂരിലെ വിനോദിനും സീതാംഗോളിയിലെ നാസറിനും (23) അപകടത്തില്‍ ഗുരുതരമായി പരിക്കേറ്റിരുന്നു.
കാസര്‍കോട് നിന്നും പുലര്‍ച്ചെ എല്‍.ബി.എസ് കോളജിലേക്ക് പോകുന്നതിനിടയില്‍ ഇവര്‍ സഞ്ചരിച്ച കെ.എല്‍ 14 ക്യു 163 നമ്പര്‍ ആള്‍ട്ടോ കാറില്‍ എതിരെ നിന്നും വന്ന മഹാരാഷ്ട്ര രജിസ്ട്രേഷനിലുള്ള നാഷണല്‍ പെര്‍മിറ്റ് ലോറി ഇടിക്കുകയായിരുന്നു. ഗുരുതരമായി പരിക്കേറ്റ മൂന്നുപേരെയും ഉടന്‍ കാസര്‍കോട്ടെ ആശുപത്രിയിലെത്തിച്ചെങ്കിലും അഫ്സല് മരിക്കുകയായിരുന്നു.
Post a Comment
0 Comments