നായന്മാര്‍മൂല (www.evisionnews.in): കാറും ലോറിയും കൂട്ടിയിടിച്ച് എസ്.എഫ്.ഐ ജില്ലാ സെക്രട്ടറ്റിയംഗവും കണ്ണൂര്‍ സര്‍വകലാശാല യൂണിയന്‍ കലോത്സവ സംഘാടകനുമായ യുവാവ് മരിച്ചു. നുള്ളിപ്പാടി ചെന്നിക്കരയിലെ അഹമ്മദ് അഫ്‌സലാ (24)ണ് മരിച്ചത്. ശനിയാഴ്ച പുലര്‍ച്ചെ നാല് മണിയോടെ നായന്മാര്‍മൂല പാണലത്ത് വെച്ചാണ് അപകടമുണ്ടായത്.
അപകടത്തില്‍ കൂടെയുണ്ടായിരുന്ന പുല്ലൂര്‍ സ്വദേശി വിനോദിനും സീതാംഗോളിയിലെ നാസറിനും ഗുരുതരമായി പരിക്കേറ്റു. കാസര്‍കോട് നിന്നും പുലര്‍ച്ചെ എല്‍.ബി.എസ് കോളജിലേക്ക് പോകുന്നതിനിടയില്‍ ഇവര്‍ സഞ്ചരിച്ച കെ.എല്‍ 14 ക്യു 163 നമ്പര്‍ ആള്‍ട്ടോ കാറില്‍ എതിരെ നിന്നും വന്ന മഹാരാഷ്ട്ര രജിസ്ട്രേഷനിലുള്ള നാഷണല്‍ പെര്‍മിറ്റ് ലോറി ഇടിക്കുകയായിരുന്നു. ഗുരുതരമായി പരിക്കേറ്റ മൂന്നുപേരെയും ഉടന്‍ കാസര്‍കോട്ടെ ആശുപത്രിയിലെത്തിച്ചെങ്കിലും അഫ്‌സല്‍ മരിക്കുകയായിരുന്നു. വിവരമറിഞ്ഞ് വിദ്യാനഗര്‍ പോലീസും സ്ഥലത്തെത്തിയിരുന്നു. മൃതദേഹം കാസര്‍കോട് ജനറല്‍ ആശുപത്രി മോര്‍ച്ചറിയില്‍ സൂക്ഷിച്ചിരിക്കുകയാണ്.
ആദൂര്‍ അബ്ദുല്ലയുടെയും അംഗഡിമുഗറിലെ സൈനബയുടെയും മകനാണ്. മുഹമ്മദ് ഹാഷിം (ദേശാഭിമാനി കാസര്‍കോട് ബ്യൂറോ സ്റ്റാഫ് റിപ്പോര്‍ട്ടര്‍), ഹാരിസ് നുള്ളിപ്പാടി (ജമാഅത്ത് സെക്രട്ടറി, നുള്ളിപ്പാടി). ഷംസീന.
Post a Comment
0 Comments