ചെര്‍ക്കള (www.evisionnews.in): സ്വകാര്യ ബസ് നിയന്ത്രണംവിട്ട് റോഡരികിലെ മതിലിലേക്ക് പാഞ്ഞുകയറി നിരവധി പേര്‍ക്ക് പരിക്കേറ്റു. തിങ്കളാഴ്ച ഉച്ചയോടെ ദേശീയപാതയില്‍ സന്തോഷ്‌നഗറിലാണ് അപകടം. കാഞ്ഞങ്ങാട് നിന്നും ഉദുമ വഴി കാസര്‍കോട്ടേക്ക് വരികയായിരുന്ന റാഹി ഡിലക്സ് ബസാണ് അപകടത്തില്‍പെട്ടത്. ബസിന്റെ ബ്രേക്ക് പൊട്ടിയതാണ് അപകടത്തിന് കാരണമെന്ന് പറയുന്നു.
സന്തോഷ് നഗറില്‍ യാത്രക്കാരെ ഇറക്കാന്‍ ശ്രമിക്കുന്നതിനിടയില്‍ ബ്രേക്ക് പൊട്ടി നിയന്ത്രണംവിട്ട് സമീപത്തെ വീടിന്റെ മതിലിലിടിച്ചുകയറുകയായിരുന്നു. റോഡരികില്‍ നിര്‍ത്തിയിട്ടിരുന്ന ബൈക്കിലും ഇടിച്ചിട്ടുണ്ട്. ഇടിയുടെ ആഘാതത്തില്‍ ബസിന്റെ ഇടതുഭാഗം ഭാഗികമായി തകര്‍ന്നു. ബസ്‌റ്റോപ്പിന് സമീപത്തായി അവില്‍മില്‍ക്ക് കടനടത്തുന്നയാള്‍ക്കും തൊട്ടടുത്തുണ്ടായിരുന്ന മറ്റൊരാള്‍ക്കുമാണ് പരിക്കേറ്റത്. ഇതുകൂടാതെ ബസിലുണ്ടായിരുന്ന യാത്രക്കാര്‍ക്കും നിസാര പരിക്കുണ്ട്. ഇവരെ ആശുപത്രിയിലേക്ക് കൊണ്ടുപോയി. വിവരമറിഞ്ഞ് വിദ്യാനഗര്‍ പോലീസ് സ്ഥലത്തെത്തിയിരുന്നു. അപകടത്തെതുടര്‍ന്ന് ദേശീയപാതയില്‍ അല്‍പനേരം ഗതാഗതം നിലച്ചു.
Post a Comment
0 Comments