പാണത്തൂരില്‍ പിതാവ് മകനെ കഴുത്ത് ഞെരിച്ച് കൊന്നു

പാണത്തൂര്‍ (www.evisionnews.in): മദ്യലഹരിയില്‍ പിതാവ് മൂന്ന് വയസുകാരനെ കഴുത്ത് ഞെരിച്ച് കൊലപ്പെടുത്തി. ചൊവ്വാഴ്ച രാത്രി പാണത്തൂര്‍ മൈലാട്ടിയിലാണ് നാടിനെ ഞെട്ടിച്ച കൊലപാതകം നടന്നത്. 

മൈലാട്ടിയിലെ രാജുവാണ് മുന്നുവയസുളള മകന്‍ രാഹുലിനെ കഴുത്ത് ഞെരിച്ച് കൊലപ്പെടുത്തിയത്. രാത്രി മദ്യപിച്ചെത്തിയ രാജു ഭാര്യപത്മിനിയെയും മകന്‍ രാഹുലിനെയും ക്രൂരമായി അക്രമിക്കുകയും അക്രമം സഹിക്കവയ്യാതായപ്പോള്‍ പത്മിനി മകനെയും കൂട്ടി അടുത്തവീട്ടിലേക്ക് ഓടാന്‍ ശ്രമിക്കുകയായിരുന്നു. ഇതിനിടയില്‍ രാജു രാഹുലിനെ പിടിച്ചു വെക്കുകയും ചിരവ കൊണ്ട് കഴുത്തിന് കുത്തുകയും ഞെരിച്ച് കൊലപ്പെടുത്തുകയുമായിരുന്നു. 

ബഹളം കേട്ട് ഓടിക്കൂടിയ നാട്ടുകാര്‍ അവശനിലയിലായ കുട്ടിയെ കൂടങ്കല്ലിലെ ആശുപത്രിയിലെത്തിക്കുമ്പോഴേക്കും മരണം സംഭവിച്ചിരുന്നു. പിന്നീട് പാണത്തൂര്‍ എയ്ഡ് പോസ്റ്റിലുള്ള പോലീസിനെ ബന്ധുക്കള്‍ വിവരമറിയിക്കുകയായിരുന്നു. മൃതദേഹം ജില്ലാ ആശുപത്രിയിലേക്ക് മാറ്റിയിട്ടുണ്ട്. സംഭവവുമായി ബന്ധപ്പെട്ട് പിതാവ് രാജുവിനെ രാജപുരം പോലീസ് അറസ്റ്റു ചെയ്തു. അതേസമയം മാനസിക വിഭ്രാന്തിയിലാണ് കുഞ്ഞിനെ കൊന്നതെന്നാണ് ബന്ധുക്കള്‍ പറയുന്നത്. 

Keywords: Kasaragod-news-panathur-madhyalahari-tuesday-mailatti-arrest-murder-case